O BAXI Ferrol celebrará este domingo, 7 de decembro, ás 18:00 horas, o seu Partido Solidario correspondente á xornada 10 da Liga Femenina Endesa, no que se enfrontará ao Lointek Gernika.
O encontro terá un forte compoñente social, xa que o club impulsa unha campaña de apoio á Cociña Económica de Ferrol, entidade que presta servizo diario a persoas en situación de vulnerabilidade.
Como parte da iniciativa, realizarase no pavillón unha recollida de alimentos non perecedoiros, convidando a afección a colaborar con produtos como arroz, pasta, legumes, conservas ou leite.
Ademais, a empresa CLESA, patrocinadora do club, sumará o seu apoio comprometéndose a doar 1 litro de leite por cada punto que anotem o BAXI Ferrol e o Lointek Gernika durante o partido. Un xesto que multiplicará o impacto solidario da xornada.
As entradas para o encontro están dispoñibles en Niebla Boutique e na web oficial: www.universitarioferrol.org.
O BAXI Ferrol agradece a colaboración da súa afección, dos seus patrocinadores e de toda a cidadanía, convidando a vivir unha tarde de baloncesto con corazón solidario.
