Este sábado 10 de xaneiro ás 19:00 horas, A Malata volverá vivir unha gran noite de baloncesto coa visita do Movistar Estudiantes, un dos históricos da competición, ao feudo do BAXI Ferrol. Un partido de máxima esixencia no que as nosas xogadoras buscarán unha nova vitoria diante da súa afección.

O equipo ferrolán chega a este encontro nun bo momento de forma, demostrando xornada tras xornada o seu carácter competitivo, a súa intensidade defensiva e a capacidade para loitar cada balón como se fose o último. A identidade do BAXI Ferrol, baseada no traballo colectivo e no compromiso, será unha vez máis clave para plantar cara a un rival de gran entidade.

Pola súa banda, o Movistar Estudiantes presenta un cadro cheo de talento, experiencia e ritmo de xogo, polo que será fundamental manter a concentración durante os corenta minutos e controlar os momentos clave do partido. O apoio da bancada será, coma sempre, un factor decisivo para empuxar ao equipo nos momentos máis duros.

A Malata ten que converterse nunha auténtica fortaleza. O BAXI Ferrol necesita sentir o alento da súa xente para seguir medrando na LF Endesa e facer do noso pavillón un lugar no que sexa moi difícil sacar algo positivo.

As entradas están xa á venda en www.universitarioferrol.org.