O BAXI Ferrol xa coñece o seu primeiro reto europeo da tempada 2026/27. O conxunto universitario deberá superar a eliminatoria previa da EuroCup Women para acceder á fase de grupos da segunda competición continental.
O equipo ferrolán afrontará esta rolda como cabeza de serie, un recoñecemento ao excelente papel realizado durante a pasada campaña tanto na Liga Femenina Endesa como na propia EuroCup Women.
A eliminatoria disputarase a dobre partido. O encontro de ida terá lugar o 24 de setembro, a domicilio, mentres que a volta celebrarase o 1 de outubro en O Inferno de Punta Arnela, onde a afección volverá desempeñar un papel fundamental para empurrar ao equipo cara á fase de grupos.
Os posibles rivais do BAXI Ferrol nesta eliminatoria son:
- 🇪🇸 Impulso 360 Estepona (España)
- 🇫🇷 C’Chartres Basket (Francia)
- 🇬🇷 Proteas Voulas (Grecia)
- 🇨🇭 Ravens de Genève (Suíza)
- 🇧🇬 Beroe Stara Zagora (Bulgaria)
O sorteo determinará nos próximos días o rival do conxunto dirixido por Lino López, que buscará por terceiro ano consecutivo formar parte da fase de grupos da EuroCup Women.
Desde o club afrontamos este novo desafío con máxima ilusión e ambición, convencidos de que o apoio da nosa afección volverá converter O Inferno de Punta Arnela nun factor diferencial nas noites europeas.
A conta atrás para Europa xa comezou.
🔥 O 1 de outubro, todos os camiños levan a Punta Arnela.
